News

Application for Electric Service Connection

1. Sinumang nagnanais na magpakabit ng serbisyo ng kuryente ay kinakailangang magsadya sa Window 1 ng One-Stop Business Center na matatagpuan sa Covered Court sa Main Office sa Calaca, Batangas o sa alinmang sangay-tanggapan ng BATELEC I para maghain ng aplikasyon para sa pagiging kasapi ng Kooperatiba at dumalo sa Pre-Membership Orientation Seminar (PMOS) sa mga sumusunod na schedule:

• Main Office                           -           Miyerkules/Biyernes,9:00AM
• Balayan Branch                    -           Huwebes, 2:00 PM
• Calatagan Satellite Ofc.      -           Martes/Huwebes, 3:00 PM
• Lemery Branch                      -           Martes/Huwebes, 3:00 PM
• Nasugbu Branch                   -           Biyernes, 10:00AM & 2:00 PM

Ang aplikasyon ay kailangang pirmahan ng personnel ng Membership Education and Development (MED) Section o kaukulang CWDO na nagsagawa ng orientation bilang katunayan ng pagdalo.

Kailangang lumagda sa logbook ng MED personnel o kaukulang CWDO ang mga dadalo ng PMOS para sa maayos na recording at monitoring.

2. Magdala ng valid ID, 2x2 picture, membership form at iba pang papeles gaya ng marriage contract o birth certificate at dalhin ito sa Window 1. Ito ay para masuri ng Membership Records Staff sa database kung ang aplikante ay mayroon nang membership o connection at kung siya ay nakadalo ng PMOS bago i-proseso ang aplikasyon para sa pagiging kasapi.

Aalamin din ng Membership Records Staff kung ang aplikante ay may pagkakautang sa Kooperatiba. Kung sakaling may pagkakautang, kailangang mabayaran muna ito ng aplikante bago i-proseso ang AESC.

3. Kumpletuhin din ang mga kinakailangang papeles gaya ng Certificate of Final Electrical Inspection (CFEI) at Fire Safety Inspection Certificate (FSIC). Dalhin ang job order o Application for Electric Service Connection (AESC) sa Window 2 kalakip ang mga nabanggit na permits gayundin ang litrato ng service entrance/metering pole na paglalagyan ng kuntador para sa kaukulang pagsusuri sa Window 2 at upang maiskedyul ang inspeksyon.

Ang mga aplikasyon lamang na may kumpletong requirements ang maaaring itakda para sa inspection ng Electrical Wiring Inspector ng kooperatiba.

Tanging ang aplikante lamang na nakapagpasa na ng AESC ang i-eendorso sa Board of Directors para maaprubahan ang membership.

4. Matapos ang inspeksyon, kaagad gagawin ng inspector ang resulta o report ukol dito. May ibibigay na slip ang Electrical Wiring Inspector na naglalaman ng resulta ng inspeksyon kung aprubado ang service entrance base sa Philippine Electrical Code gayundin ang typical metering/service pole o hindi aprubado at may dapat pang baguhin.

Ipaayos agad sa inyong electrician ang anumang rekomendasyon ng Inspector. Kapag naisaayos ito, kailangang bayaran ng electrical wiring contractor (o ng may-ari) ng establisyimento ang re-inspection fee (at VAT) na P336.00 upang maisagawa ang re-inspection. Ang nasabing bayarin ay kailangang bayaran sa TUWING HINDI PAPASA sa inspection ang aplikasyon.

5. Kung aprubado ang inspeksyon, magsadya lamang sa Window 2  para sa pagpapasok ng job order at kaukulang permits kalakip ang membership application form. Bayaran sa Window 6 o 7 ang ₱50.00 membership fee; meter base (P336.00) kung kinakailangan batay sa isinumiteng schedule of loads; service drop #6 kung lampas ng 30 meters ang kinakailangan batay sa rekomendasyon ng Electrical Wiring Inspector at  inspection fee at connection fee para sa residential subsequent connections o kung hindi residential connection ang i-aapply.
6. Dalhin sa Window 3 ang mga papeles para sa kaukulang pagrerekord at kunin ang meter base sa PUHW (kung kinakailangan).
7. Matapos bayaran at maiayos lahat ang kaukulang requirements ng kooperatiba, ang inyong aplikasyon ay diretso nang ipo-proseso para maitakda ng Technical Services Department (TSD) ang pagkakabit ng serbisyo ng kuryente.
8. Hintayin ang lineman na magkakabit ng kuntador sa inyong bahay o gusali.

 

 

MGA PAALALA:

 

LIBRE ANG KUNTADOR

• Para sa una at mga kasunod na koneksyon sa anumang uri ng consumer MALIBAN sa mga residential applicants na may exclusive transformer na 37.5 KVA pataas at non-residential applicants na may exclusive transformer.
• Ito ay alinsunod sa Office Memorandum No. 30-08 na may petsang Agosto 1, 2008 at Chapter II, Article 8 ng Magna Carta for Residential Electric Consumers.

 

 

LIBRE ANG SERVICE DROP WIRE #6

• Libre hanggang 30 meters ang SERVICE DROP WIRE #6 sa LINE SIDE (linya mula sa kuntador patungo sa poste ng BATELEC I) para sa UNANG koneksyon ng residential consumer.
• Ito ay ayon sa Chapter II, Article 14 ng Magna Carta for Residential Electric Consumers.
• Sakaling lampas sa 30 meters ang kailangan ng aplikasyon, kailangang bilihin ang kahustuhang linya.
• Sakaling mas maikli sa 30 meters ang kailangan ng aplikasyon, hindi ibibigay ng BATELEC I ang kabuuang 30 meters kundi ang kinakailangang haba o sukat lamang para sa aplikasyon.
• Sakaling hindi service drop #6 ang kailangan ng aplikasyon, kailangang bilihin ang service drop na akma sa papakabitang bahay/gusali.
• Ang haba at klase ng service drop wire na kailangan para sa aplikasyon ay batay sa rekomendasyon ng Electrical Wiring Inspector ng BATELEC I.